Ысык-Көлгө куйган дарыяларга 582 миң даана форель чабагы коё берилди
Күн мурун Балык өнөр жайы комплекси департаментинин Тоң районундагы Регионалдык аклиматташтыруу жана балык өндүрүү-өстүрүү бөлүмүнүн (станциясынын) кызматкерлери тарабынан Ысык-Көл жилингири (форель) балыгынын чабактарын Ысык-Көл көлүнө куйган дарыяларга коё берүү иш-чарасы өткөрүлдү. Бул тууралуу Айыл чарба министрлигинен билдиришти.
Иш-чарага Тоң райондук мамлекеттик администрациясынын өкүлдөрү, Туристтик-экологиялык милиция, Экологиялык техникалык көзөмөл кызматынын кызматкерлери, Кыргыз Республикасынын Улуттук илимдер академиясынын Биология институтунун илимий адистери жана Ысык-Көл мамлекеттик коругунун кызматкерлери катышты.
Аталган иш-чаранын алкагында жалпы 582 миң даана Ысык-Көл жилингири (форель) балыгынын чабактары көлдүн балык ресурстарын көбөйтүү максатында Ысык-Көлгө куйган дарыяларга коё берилди.
Чабактар төмөнкүдөй бөлүштүрүлдү:
- Ак-Терек суусуна — 80 миң даана
- Тоң суусуна — 150 миң даана
- Кекилик суусуна — 50 миң даана
- Тамга суусуна — 50 миң даана
- Жети-Өгүз дарыясына — 50 миң даана
- Каракол суусуна — 50 миң даана
- Кара-Сууга — 32 миң даана
- Жыргалаң дарыясына — 60 миң даана
- Түп дарыясына — 60 миң даана
Бул иш-чара Ысык-Көлдүн балык ресурстарын сактоо, көбөйтүү жана экологиялык тең салмактуулукту камсыз кылуу максатында жүргүзүлдү.
