Ошто мыйзамсыз деп табылган 2,46 га жер мамлекетке кайтарылды
Суу ресурстары, айыл чарба жана кайра иштетүү өнөр жайы министрлигинин Жерди жана сууну көзөмөлдөө кызматынын Ош шаары жана Ош облусундагы аймактык башкармалыгынын доо арызы Ош облусунун административдик соту тарабынан канааттандырылды. Бул тууралуу министрликтен билдиришти.
Маалыматка ылайык, соттук териштирүүдө Кара-Суу районуна караштуу Датка айыл өкмөтүнүн жооптуу кызмат адамдары мыйзамды бузгандыгы аныкталды. Тактап айтканда, 589 жаранга жеке турак жай куруу үчүн жер тилкелери мыйзамсыз бөлүнүп, каттоо китебине киргизилген эмес жана трансформация процедурасы аткарылбай калган. Кээ бир жарандарга жеке менчик укугу тууралуу мамлекеттик актылар да берилген.
Ош облусунун административдик соту 41 токтомду жараксыз деп таап, жалпы аянты 2,46 гектар жер мамлекетке кайтарылды. Бул чечим «Жеке менчик турак үй куруу үчүн жер участокторун берүүнүн тартиби жөнүндө» жобонун талаптары бузулганы менен байланыштуу.
