Жеңил унааларды сатууда убактылуу салыктык жеңилдиктер киргизилди
Мамлекеттик салык кызматы жеңил автомототранспорт каражаттарын сатууга байланыштуу убактылуу салыктык жеңилдиктер киргизилгенин маалымдады.
Өзгөртүүлөр Президент Садыр Жапаров 2025-жылдын 31-декабрында кол койгон мыйзамга ылайык кабыл алынган. Аталган ченемдер 2029-жылдын 1-январына чейин күчүндө болуп, ТЭИ ТН 8703 товар позициясына кирген жеңил автомототранспорт каражаттарына тиешелүү.
Тактап айтканда, мыйзам менен төмөнкү жеңилдиктер каралган:
- жеке жактар (катталган жеке ишкерлер жана юридикалык жактардан тышкары) тарабынан унаа сатуу, анын ичинде бир календардык жыл ичинде экиден көп унаа сатылган учурда да, системалуу ишкердик катары эсептелбейт;
- жеке жактардын жеңил унаа сатуудан алган кирешесине киреше салыгы салынбайт;
- унаа сатуудан түшкөн кирешелер пайда салыгынан бошотулат;
- жеңил автомототранспорт каражаттарын сатууда кошумча нарк салыгы (КНС) алынбайт;
- унаа сатуудан алынуучу салык колдонулбайт.
Мындан тышкары, жеке жактар (жеке ишкерлерден тышкары) 2026-жылдын 1-январына чейин унаа сатуудан алган кирешелери боюнча салык, туум жана санкциялардан бошотулат.
Кабыл алынган ченемдер калкка жана ишкердик субъекттерине салыктык жүктү азайтууга, ошондой эле автотранспорт рыногундагы операциялардын ачыктыгын жогорулатууга багытталган.
