Седандар джиптерге каршы: Кыргызстанда чындыгында кайсы унаалар көбүрөөк колдонулат
Кыргызстандын көчөлөрүн караганда кроссоверлер менен жол тандабастар барган сайын көбөйүп жаткандай сезилгени менен унаа паркынын расмий статистикасы таптакыр башка көрүнүштү көрсөтөт. Өлкөдө жеңил унаалардын негизги бөлүгүн мурдагыдай эле седандар жана универсалдар түзөрүн economist.kg сайты анализ кылды.
Транспорт каражаттарын жана айдоочулук курамды каттоо боюнча мамлекеттик борбордун маалыматына ылайык, 2026-жылдын башына карата Кыргызстанда 665 миң 660 седан жана 379 миң 198 универсал катталган. Жалпысынан бул 1 миллион 44 миңден ашык унааны түзөт. Башкача айтканда, өлкөдөгү ар бир экинчи жеңил автоунаа дээрлик ушул эки кузов тибине таандык.
Легендарлуу Toyota Camry ондогон жылдар бою Кыргызстандагы эң популярдуу седандардын бири катары өз позициясын сактап келүүдө, бирок акыркы мезгилде кореялык атаандаштарына бир аз жол бере баштады.
Салыштыруу үчүн айта кетсек, хэтчбэктердин саны 281 миң 413, минивэндер — 104 миң 890. Андан кийин кескин төмөндөө байкалат — мындан ары өлкө масштабында сейрек кездешкен, нишалык категориялар гана калат.
Honda Fit — Кыргызстандагы эң белгилүү (айрым учурларда талаштуу да) хэтчбэктердин бири.
Мындай бөлүштүрүү автосалондордун витриналарына эмес, унааларды колдонуудагы реалдуу шарттарга караганда логикалуу көрүнөт.
Седан жана универсал — баа, сыйымдуулук жана тейлөөнүн ортосундагы оптималдуу компромисс. Алар сатып алууда арзан, оңдоого жеңилирээк, көпчүлүк айдоочуларга жакшы тааныш жана шаар ичинде да, аймактар аралык каттамдарда да ыңгайлуу.
Subaru Outback республикада кеңири тараган моделдердин бири болуп, практикалуулугу менен динамикасынын айкалышы үчүн өзгөчө бааланат.
Кыргызстандын авторыногундагы контраст сейрек кузов түрлөрүн караганда айкын көрүнөт. Маселен, өлкөдө болгону 161 кабриолет, 9 автодом, 7 «үй-унаа» (дом на колесах) жана 11 гана брондолгон жеңил автоунаа катталган. Бул тенденция эмес, статистикалык экзотика десек болот.
Volkswagen Golf Cabriolet — Кыргызстан көчөлөрүндө сейрек жолугучу кабриолеттердин бири.
Эл аралык автоунаа ташуучулар ассоциациясынын (КР) мүчөсү Сергей Голинконун айтымында, акыркы эки жылда Кыргызстанда седан жана универсал унааларынын үлүшү транспорт агымында туруктуу өсүүдө.
"Мунун бир нече себеби бар. Биринчиден, акыркы жылдары республика боюнча сапаттуу жолдор көп курулуп, реконструкцияланды. Ошол эле учурда автоунаалардын 90 пайызга жакыны шаар ичинде жана трассаларда колдонулат, ал жерде толук жетектөө (полный привод) зарыл эмес", — деди ал.
Эксперт экономикалык фактор да маанилүү роль ойноорун белгиледи.
"Седандар менен универсалдар сатып алууда жана бажыдан өткөрүүдө арзан, тейлөө жана оңдоо чыгымдары да төмөн. Универсалдар болсо сыйымдуулугу жагынан көп учурда толук жетектүү кроссоверлерден кем калбайт, ошол эле учурда үнөмдүү болуп саналат".
Economist.kg менен болгон маекте адис мындай унаалардын колдонууга ыңгайлуулугун да белгиледи:
"Седан жана универсал унаалардын күйүүчү май чыгымы аз, тыгыз шаардык кыймылда айдоого ыңгайлуу жана токтотууга (парковка) жеңилирээк".
