Кыргызстан менен Катар социалдык өнүгүү жаатында кызматташууну бекемдейт
Доха шаарында (Катар) өтүп жаткан Экинчи дүйнөлүк социалдык өнүгүү саммитинин алкагында Эмгек, социалдык камсыздоо жана миграция министри Канат Сагынбаев Катардын Үй-бүлө жана социалдык өнүгүү министри Бутайна бинт Али Аль Жабр Аль Нуайми менен эки тараптуу жолугушуу өткөрдү. Бул тууралуу ведомстводон билдиришти.
Жолугушууда социалдык жана эмгек тармагындагы кызматташтык маселелери талкууланып, социалдык коргоо системасын өнүктүрүү, калктын аяр катмарына колдоо көрсөтүү жана үй-бүлөнүн коомдогу ролун бекемдөө маселелерине көңүл бурулду.
Тараптар социалдык саясатты санариптештирүү, балалуу үй-бүлөлөрдү жана майыптуулугу бар жарандарды колдоо, ошондой эле жаштарды иш менен камсыз кылуу жана кесиптик окутуу багытында тажрыйба алмашуунун маанилүүлүгүн белгилешти.
Министр Канат Сагынбаев менен Бутайна бинт Али Аль Жабр Аль Нуайми социалдык кызматташтыкты чыңдоонун маанисин белгилеп, эки министрликтин ортосунда Өз ара түшүнүшүү жөнүндө Меморандумга кол коюшту.
Жолугушуунун жыйынтыгында тараптар социалдык өнүгүү жана жарандардын жыргалчылыгын жогорулатууга багытталган кызматташууну мындан ары да улантууну макулдашышты.
