Кыргызстанда Беккари чуңкурлары крематорийлерге алмаштырылат
Депутат Салтанат Аманова Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында райондордо Беккари чуңкурларын уюштуруу зарыл экендигин билдирди.
Анын айтымында, Ош шаарында бир гана Беккари чуңкуру бар, ал 1970-жылдары курулган жана азыр толуп калган. Ушундан улам жергиликтүү тургундар малдын өлүгүн каалаган жерге таштоого аргасыз болууда.
Депутаттын пикиринде, Суу ресурстары, айыл чарба жана кайра иштетүү өнөр жайы министрлиги сунуштаган долбоордун алкагында мындай чуңкурларды өлкөнүн бардык аймактарында курууга мүмкүнчүлүк бар.
Ведомствонун жетекчисинин орун басары Жаныбек Керималиев бул маселе башка долбоордун алкагында каралып жатканын айтты. Ал ошондой эле Беккари чуңкуру толгондо, ал обочолонтула турганын кошумчалады.
Өз кезегинде Ветеринардык кызматтын директору Адилет Сотовалдиев министрлик жергиликтүү бийлик органдары менен биргеликте Беккари чуңкурларын крематорийлерге алмаштырып жатканын билдирди. Анын айтымында, Ысык-Көл облусун өнүктүрүү фондунун каражаттарына Жети-Өгүз жана Тоң райондорунда төрт крематорий курулган, ал эми Кара-Сууда ири крематорий ишке берилген.
"Биз бул тажрыйбаны бүт республика боюнча киргизүүнү каалап жатабыз", — деди ал.
