Ноокатта заманбап талаптарга жооп берген жаңы мектеп курулду
Ош облусунун Ноокат районундагы Герейт-Шорон мектебинин курулушу толук бүткөрүлдү, жакында пайдаланууга берилет. Мектептин курулушу республикалык бюджеттен каржыланып, наркы 74 миллион сомду түздү. Бул тууралуу Курулуш, архитектура турак жай-коммуналдык чарба министрлигинен билдиришти.
Башкы план боюнча мектеп 225 орунга ылайыкталган, эки кабаттуу окуу корпусу жана спорт залы бар. Мындан тышкары лаборатория, китепкана, дарыгердин бөлмөсү, компьютердик класс, балдар жана кыздар үчүн эмгек класстары каралган. Объекттин жалпы аянты 1705 чарчы метрди түзөт.
Курулуш-монтаждоо иштери заманбап талаптардын негизинде жүргүзүлүп, Курулуш министрлигинин көзөмөлүндө аткарылды.
