Б.Төрөбаев “Таштан” фермердик чарбасынын ишмердүүлүгү менен таанышты
Суу ресурстары, айыл чарба жана кайра иштетүү өнөр жайы министри Бакыт Төрөбаев Москва районунун Петровка айылында жайгашкан “Таштан” фермердик чарбасына барып, чарбанын ишмердүүлүгү жана өндүрүш процесси менен жеринде таанышты. Бул тууралуу министрликтин маалымат кызматынан билдиришти.
Бул чарба 2025-жылдын 15-майында министрликтин №05/2-17/109 буйругунун негизинде асыл тукум субъектиси катары расмий каттоодон өткөн.
“Таштан” фермердик чарбасы тууралуу:
- Чарба бодо малдын “Симментал” породасын өстүрүүгө адистешкен.
- Жалпы мал саны — 331 баш, анын ичинен 170и тубар уйлар.
- Бир уйдан орто эсеп менен 6100 кг сүт алынат.
- Чарба жылына орто эсеп менен 10 баш асыл тукум мал сатат.
- Жылдык төл алуунун көрсөткүчү — 85%.
- Өндүрүштү натыйжалуу жүргүзүү үчүн 548,6 га жер пайдаланылат, анын 190 гектары Айыл чарба фондунан ижарага алынган.
Ферманын жетекчиси Юсупов Вахабжон Таштанович мал чарбасын заманбап ыкмалар менен жүргүзүп, аймактагы асыл тукум мал багытын өнүктүрүүгө олуттуу салым кошуп келет.
Министрдин сапары фермердик чарбанын келечектеги өнүгүүсүнө, асыл тукум мал багытын кеңейтүүгө жана мамлекеттик колдоонун мындан ары да улантыларына ишеним берди.
