Быйыл Бишкекте тыюу салынган заттарды өрттөгөндөргө 2 903 500 сом өлчөмүндө айып пул салынды
Муниципалдык инспекциянын инспекторлору тарабынан мончо, сауна ээлери менен санитардык нормаларды сактоо боюнча түшүндүрүү иштери жүргүзүу уланууда. Бишкек шаарынын мэриясынан кабарлагандай, 2025-жылдын 11 айында, Бишкек шаарынын мэриясынын Муниципалдык инспекциясы тарабынан 204 рейд өткөрүлдү.
Анын жүрушундө адистер 650дөн ашык чарба субъектилери (өнөр-жай ишканалар, мончо, сауна жана жеке турак үйлөр) текшерилген. Билдирүүгө караганда тыюу салынган заттарды өрттөө фактысы боюнча Кыргыз Республикасынын «Укук бузуулар жөнүндө» кодексинин 115-беренесинин 3-бөлүгүнүн талабына ылайык 290 протокол түзүлүп, 2 903 500 сом өлчөмүндө айып пулдар салынган.
Ошондой эле рейддер учурунда тиричилик калдыктарын жана ар кандай таштандыларды мештерде өрттөө – айлана-чөйрөгө жана адамдардын ден соолугуна чоң зыян келтирери түшүндүрүлүүдө. Таштандылар күйгөндө абага диоксин, фуран сыяктуу уулуу заттар бөлүнүп чыгып, дем алуу органдарына, жүрөк-кан тамыр системасына, айрыкча балдар менен улгайган адамдардын саламаттыгына олуттуу зыян тийгизет.
Мындан сырткары, 0–13 мм фракциясында көмүрду колдонуу да атмосфералык абанын булганышын күчөтөрү белгиленүүдө.
