Россиядан Кыргызстанга 1 147 тоннага жакын гуманитардык жардам келди
Кыргызстанга Россия Федерациясынан 1 147 тоннага жакын гуманитардык азык-түлүк жардам жеткирилди. Ал БУУнун Дүйнөлүк азык-түлүк программасы (ВПП ООН) аркылуу акысыз негизде берилди. Бул тууралуу Эмгек, социалдык камсыздоо жана миграция министрлигинен билдиришти.
Байытылган буудай уну жана өсүмдүк майы ВПП ООН долбоорлоруна катышкан болжол менен 4 600 аз камсыз болгон үй-бүлөгө таратылат. Алар ирригациялык жана ичүүчү суу тутумдарын калыбына келтирүү, дарак отургузуу, дарыя жээктерин бекемдөө иштерине катышышат, ошондой эле окутуу программаларынан өтүшөт.
Максаттуу үй-бүлөлөргө 300 кг ун жана 30 литр май, ал эми окутууга катышкандарга 150 кг ун жана 15 литр май берилет.
Долбоорлор калктын климаттык коркунучтарга туруктуулугун жогорулатууга жана эмгек мүмкүнчүлүктөрүн кеңейтүүгө багытталган.
Иш-чарага тиешелүү мамлекеттик өкүлдөр, Россия Федерациясынын элчилиги жана ВПП ООНдун жетекчилиги катышты. Россия Федерациясы Кыргызстандагы ВПП ООНдун эң ири донорлорунун бири болуп саналат.
