VI Дүйнөлүк көчмөндөр оюндары: "Биримдик кербени" долбоору башталат
VI Дүйнөлүк көчмөндөр оюндарынын алкагында Бишкек шаарында "Биримдик кербени" аттуу уникалдуу маданий долбоор башталат. Ал Кыргызстандын бардык аймактарын камтып, суунун биримдиктин, тазалыктын жана жаңылануунун символу катары өлкө боюнча сапарын чагылдырат. Бул тууралуу Бишкек шаардык мэриясынан билдиришти.
Долбоордо ар бир аймактын ыйык дарыялары, көлдөрү жана булактары өзгөчө руханий мааниге ээ болуп, улуттук спортту, маданиятты жана жашоону даңазалаган “Баатырлар” жана “Элчилер” активдүү катышат.
Долбоордун негизги учурларынын бири — ыйык булактардан алынган суу менен Көөкөрдү толтуруу аземи. Өлкөнүн ар кайсы бурчунан чогултулган суу Бишкекке жеткирилип, Дүйнөлүк көчмөндөр оюндарынын алкагында достуктун жана ынтымактын символуна айланат.
Мындан тышкары, шаар тургундары жана коноктору үчүн биримдиктин бул белгисин көрүп, эстеликке сүрөткө түшө турган атайын жайлар уюштурулат. Бишкек шаары долбоорду даярдоого жана өткөрүүгө активдүү катышып, улуттук демилгени колдоодо.
"Биримдик кербени" — бул маданий долбоор гана эмес, Кыргызстандын бардык аймактарын жана элдерди бириктирген, салт-санааны, руханий мурасты жана биргелешкен аракеттин күчүн даңазалаган чоң улуттук жөрөлгө.
