Майыптыгы бар адамдар үчүн инклюзивдик мүмкүнчүлүктөр кеңейүүдө
Күн мурун Эмгек, социалдык камсыздоо жана миграция министрлиги менен Майыптыгы бар адамдардын иштери боюнча Кеңеш Бириккен Улуттар Уюму менен биргеликте Кыргызстанда майыптыгы бар адамдардын укуктарын жана инклюзиясын илгерилетүүгө багытталган БУУнун Майыптык маселелери боюнча Глобалдык фондунун (UNGDF) эки жылдык долбоорунун жыйынтыктары менен тааныштырды. Бул тууралуу Эмгек, социалдык камсыздоо жана миграция министрлигинен билдиришти.
Долбоордун алкагында:
- майыптыгы бар адамдарга байланыштуу улуттук саясат бекемделип,
- эрте кийлигишүү кызматы жана инклюзивдүү билим берүү өнүктүрүлүп,
- статистикалык маалыматтар кеңейтилди,
- тиешелүү мекемелердин потенциалы жогорулатылды,
- Кыргыз мыйзамдары БУУнун Конвенциясына шайкеш келтирүүгө шарт түзүлгөн.
Жыйын учурунда министрдин орун басары А. Дж. Орозбаева 2025-жылы "Майыптыгы бар адамдардын укуктары жана кепилдиктери жөнүндө" мыйзамдын жаңыланганын белгиледи. Жаңы мыйзам майыптыгы бар жарандарды коргоо, колдоо жана коомго активдүү катышууга шарттарды түзүүгө багытталган.
Ошондой эле, 2025-жылдын жаңы Эмгек кодекси майыптыгы бар адамдар үчүн жумуш орундарын кеминде 4% квота менен камсыздоону карайт. 2024–2025-жылдарда 552 майыптыгы бар адам жумушка орноштурулуп, 300дөн ашык адам кыска мөөнөттүү кесиптик окутууга жиберилди.
Бул долбоордун жыйынтыктары майыптыгы бар адамдар үчүн инклюзивдүү кызматтарды мындан ары өнүктүрүүгө бекем негиз түзөт жана алардын социалдык, экономикалык жана коомдук турмушуна толук кандуу катышуусуна өбөлгө түзөт.
