Ветеринардык коопсуздукту камсыздоо үчүн видеобайкоо системалары орнотулууда
Суу ресурстары, айыл чарба жана кайра иштетүү өнөр жайы министрлиги үстүбүздөгү жылдын 11 айынын жыйынтыгы менен аткарылган иштер тууралуу коомчулукка маалымат берүүнү улантууда. Бул тууралуу министрликтин басма сөз кызматы кабарлады.
Мал союучу жайларда жана мал базарларында коопсуздукту жогорулатуу максатында Ветеринардык жана фитосанитардык көзөмөл кызматы видеобайкоо системаларын этап-этабы менен киргизүүдө.
Учурда республика боюнча 54 мал союучу жайга, 5 мал базарына жана Москва районундагы 1 ветеринардык-санитардык экспертиза лабораториясына видеокамералар орнотулган.
Азыркы тапта мал базарларында жана мал союучу жайларда жалпы 23 камера үзгүлтүксүз иштеп, процесстерди көзөмөлдөп турат.
Мындан тышкары, кызмат Dahua компаниясынын адиси менен биргеликте кошумча 37 камера орнотуу жана аларды Ситуациялык борбордун системасына интеграциялоо иштерин жүргүзүүдө.
Министрлик 11 айдын жыйынтыгы боюнча маалыматтарды коомчулукка мындан ары да үзгүлтүксүз сунуштап турат.
