Бишкекте "CITY Market" соода борборун куруучу компания аныкталды
Мамлекеттик-жеке өнөктөштүк (МЖӨ) алкагында «Бишкек шаарынын 9-кичирайонунда “CITY Market” заманбап базарын долбоорлоо жана куруу» долбоору боюнча өткөрүлгөн ачык конкурсунун жыйынтыгы менен жеке өнөктөш катары долбоор боюнча эң тең салмактуу, комплекстүү жана экономикалык жактан максатка ылайыктуу сунушту берген "Ак Ордо Булак" ЖЧКсы жеңүүчү деп аныкталды. Бул тууралуу Бишкек шаардык мэриясынан билдиришти.
Долбоор Байтик-Батыр көчөсү 6а жана 4а даректериндеги турак жайлардын ортосундагы мейкиндикте ишке ашырылат. Максаты – дүң жана чекене соода үчүн заманбап шаардык инфраструктураны түзүү, соода мейкиндигинин ыңгайлуулугун, коопсуздугун жана функционалдуулугун камсыз кылуу.
Долбоордо кичи базарды куруу менен заманбап технологиялык чечимдерди киргизүү каралган. Ошондой эле долбоордун кошумча максаттары катары:
- жеткиликтүү жана экологиялык жактан туруктуу шаардык чөйрөнү түзүү;
- калкка көрсөтүлүүчү кызматтардын жана азык-түлүктөрдүн сапатын жогорулатуу;
- борбор калаанын тургундары үчүн эс алуу жана социалдык өз ара аракеттенүү үчүн ыңгайлуу коомдук мейкиндиктерди калыптандыруу.
МЖӨ долбоору борбор калаадагы чакан жана орто бизнеске заманбап шарт түзүү жана калк үчүн ыңгайлуу соода мейкиндигин камсыз кылуу багытында маанилүү кадам болуп эсептелет.
