Мал чарбачылыгында тоюттандыруунун заманбап ыкмалары жайылтылууда
Кыргыз мал чарба жана жайыт илим-изилдөө институтунда 2026-жылдын 13-14-январь күндөрү малды тоюттандыруу багыты боюнча адистер үчүн окуу-семинар өткөрүлдү. Иш-чара KOICA эл аралык кызматташтык агенттигинин гранттык долбоорунун алкагында уюштурулду. Бул тууралуу Айыл чарба министрлигинен билдиришти.
Семинардын негизги максаты – мал чарбачылыгында илимий негизделген тоюттандыруу системаларын киргизүү, малдын продуктивдүүлүгүн жогорулатуу жана тоют ресурстарын натыйжалуу пайдалануу болуп саналат. Ошондой эле адистердин азыктандыруу багытындагы илимий-практикалык билимин жана лабораториялык компетенцияларын өнүктүрүү көздөлдү.
Окуу модулдары ири мүйүздүү мал үчүн тоюттардын азыктуулугун аныктоо, рацион түзүүдө негизги азыктык элементтердин балансын сактоо, тоюттун сиңимдүүлүгүн баалоо жана алынган маалыматтарды заманбап программалар аркылуу талдоо маселелерин камтыды.
Аталган окуу-семинар институттун илимий-изилдөө иштерин күчөтүүгө, тоюттандыруу багытындагы лабораториялык мүмкүнчүлүктөрдү кеңейтүүгө жана мал чарбачылыгында натыйжалуу азыктандыруу технологияларын жайылтууга өбөлгө түзөт.
