Мал чарбасына багытталган насыялардын натыйжалуулугу бааланды
Кечээ Суу ресурстары, айыл чарба жана кайра иштетүү өнөр жай министринин орун басары М.И. Дуйшеев "Айыл Банк" ААКтын жана "Элдик Банк" ААКтын жетекчилиги менен биргеликте Чүй облусунун Москва жана Сокулук райондоруна иш сапары менен барды. Бул тууралуу ведомстводон билдиришти.
Иш сапардын жүрүшүндө агроөнөр жай комплексин колдоо боюнча мамлекеттик программалардын алкагында жеңилдетилген насыя алып, малды бордоп семиртүү жана көбөйтүү менен алектенген бир катар мал чарба субъектилеринин иши менен таанышты.
Сапардын негизги максаты – долбоорлордун иш жүзүндөгү жыйынтыктарын көрүү, жеңилдетилген кредиттик каражаттардын максаттуу жана натыйжалуу пайдаланылышына баа берүү болду. Ошондой эле фермерлер жана ишкерлер менен жолугушууларда эт продукциясын өндүрүүнү көбөйтүү, мал башын арттыруу, материалдык-техникалык базаны жакшыртуу жана айыл жергесинде жумуш орундарын түзүү маселелери талкууланды.
Иш сапардын жыйынтыгында жеңилдетилген насыялоо эт мал чарбасын өнүктүрүүгө жана өлкөнүн азык-түлүк коопсуздугун чыңдоого оң таасир берери белгиленди.
