Таласта курулуш ченемдерин сактабаган компания 200 миң сом айыпка жыгылды
Курулуш, архитектура жана турак жай-коммуналдык чарба министрлигинин Мамлекеттик архитектура-курулуш контролдоо департаментинин Талас региондук башкармалыгы тарабынан аймактагы курулуш объектилери көзөмөлдөнүп келет.
Текшерүү иштеринин алкагында, Талас районуна караштуу Шумкар-Уя айыл өкмөтүнүн Чоң-Токой айылында курулуп жаткан таза суу системасынын долбоорлоо жана курулуш процессинде техникалык регламенттердин, курулуш ченемдеринин, эрежелеринин жана стандарттарынын сакталбагандыгы аныкталды. Ошондой эле тиешелүү башка ченемдик укуктук актылардын талаптары бузулган.
Натыйжада, текшерүү актысы түзүлүп, курулуш иштерин аткарып жаткан “НТ ГРУПП-СТРОЙ” ЖЧКсына 200 миң сом өлчөмүндө айып пул салынды жана бузуулардын бирдиктүү реестрине киргизилди.
Министрлик курулуш тармагында иш жүргүзгөн бардык уюмдарды жана жеке жактарды мыйзам талаптарын так сактоого чакырат. Мындан тышкары, жарандардын коопсуздугун камсыз кылуу максатында техникалык регламенттерди жана курулуш стандарттарын так аткарууга өзгөчө көңүл бурууну эскертет.
