Жибек жолунда курулуп жаткан көпүрөдө сапатсыз тосмолор аныкталды
Бишкек шаарынын мэри Айбек Джунушалиев көчмө жыйын өткөрүп, борбор калаадагы бир катар негизги инфраструктуралык объектилерде аткарылып жаткан иштердин жүрүшү менен таанышты. Бул тууралуу мэриянын басма сөз кызматынан маалымдашты.
Иш сапардын алкагында мэр Жибек жолу проспектисинде курулуп жаткан алты тилкелүү жаңы көпүрөгө барып, сапатсыз тосмолор аныкталганын айтып, подрядчы менен түзүлгөн келишимди кыска мөөнөттө бузуу тапшырмасын берди. Ошондой эле дарыянын нугундагы жана ЖЭБдин техникалык каналындагы мыйзамсыз курулуштарды текшерүү жана демонтаждоо тапшырмалары берилди.
Мындан тышкары, Айбек Джунушалиев Ауэзов көчөсүндөгү көрктөндүрүү иштерин, Шабдан Баатыр көчөсүндө променаддык аймак түзүү, Сагымбай Манасчы көчөсүндө көп кабаттуу унаа токтотуучу жай куруу жана Шабдан Баатырдан Сагымбай Манасчыга чейин жаңы көпүрө куруу пландарын карап чыкты.
Мэр мындай көчмө кароону шаардагы башка объектилерде да жүргүзүүнү тапшырды.
