100 миң жаран идентификациялык номерлер боюнча кыйынчылыктарга дуушар болууда
Бүгүн, 21-январдагы Жогорку Кеңештин жыйынында «Милдеттүү мамлекеттик социалдык камсыздандыруу максатында Кыргыз Республикасынын жарандарын жекече (индивидуалдык) эсепке алуу жөнүндө» Мыйзамына өзгөртүүлөрдү киргизүү тууралуу» мыйзам долбоору каралып, биринчи окууда кабыл алынды.
Отурумда баяндама жасаган санариптик өнүктүрүү жана инновациялык технологиялар министринин биринчи орун басары Нурсултан Кубанов мыйзам долбоору ички карама-каршылыктарды жоюу жана КРнын жарандарына, чет өлкөлүк жарандарга жана жарандыгы жок адамдарга идентификациялык жеке номерлерди ыйгаруу процессин жөнгө салуу максатында иштелип чыккандыгын билдирди.
“Азыркы колдонуудагы мыйзамга ылайык, идентификациялык жеке номерлерге өзгөртүү киргизүү 2017-жылдын 1-июлуна чейин кетирилген техникалык каталар менен чектелген. Бирок практикада техникалык каталар 2017-жылдан кийин дагы орун алып келет. Аларга жынысы, туулган күнү ж.б маалыматтын туура эмес көрсөтүлүшү кирет.” – дейт Кубанов.
Мындан сырткары, Кубанов эки жана үч эселенген жеке идентификациялык номерлерди берүү боюнча кыйынчылыктарга болжол менен 100 миң жаран дуушар болуп жатканын ачыктады.
Талкуу маалында депутаттар эсепке алуу номерин ыйгаруу тартибине, техникалык каталарды кетирбөө жана оңдоо механизмдерине байланыштуу маселелерди көтөрүштү.
