Күрөөканадан иштеп 4 млн сомду өзүнө ыйгарып алган аял кармалды

Чүй облусунда күрөөкананын кызматкери ишенип берилген мүлктү ыйгарып алуу жана коротуу фактысы боюнча шектүү катары кармалганын Чүй облусунун ИИББнин басма сөз кызматы билдирди.

2026-жылдын 11-январында Ысык-Ата райондук ички иштер бөлүмүнө 1999-жылы туулган Ц.К. аттуу жаран арыз менен кайрылып, Кант шаарындагы "У.П." күрөөканасында эксперт-баалоочу-кассир болуп иштеген, материалдык жоопкерчиликтүү адам болгон С.М. аттуу жаранга чара көрүүнү суранган. Анын айтымында, С.М. насыяларды жогорулатылган баада жасалма түрдө тариздеп, акча каражаттарын ыйгарып алган.

Алдын ала маалыматтар боюнча, 2024-жылдын ноябрынан 2025-жылдын 31-декабрына чейинки мезгил аралыгында С.М. жалпы суммасы 4 000 000 сом акчаны ыйгарып алган.

Бул факты боюнча КР Кылмыш-жаза кодексинин 210-беренеси (Ишенип берилген мүлктү ыйгарып алуу же коротуу) менен кылмыш иши козголду.

КР Кылмыш-жаза процессуалдык кодексинин 96-беренесине ылайык, 1986-жылы туулган С.М. шектүү катары кармалып, убактылуу кармоочу жайга киргизилген.