Таласта эт баасын жогорулаткан соода түйүндөрүнө айып салынды
Монополияга каршы жөнгө салуу кызматынын Талас облустук бөлүмү эттин баасын мамлекеттик жөнгө салуу боюнча мониторинг жүргүздү.
Аталган кызматтын маалыматына ылайык, текшерүү 2026-жылдын 3-апрелинде өткөрүлүп, ага жергиликтүү бийлик, салык кызматы, ички иштер органдары жана ЖМК өкүлдөрү катышты. Мониторинг Талас шаарынын борбордук базарынын аймагында, ошондой эле "Алтын Казык" жана "Глобус" соода түйүндөрүндө жүргүзүлдү.
Маалыматка ылайык, облус боюнча уй этине 670 сом, кой этине 680 сом өлчөмүндө максималдуу чекене баа белгиленген. Бирок текшерүүнүн жүрүшүндө айрым соода түйүндөрүндө уй эти белгиленген баадан жогору сатылып жатканы аныкталды.
Анын негизинде "Алтын Казык", "Глобус" соода борборлору жана Оторбаев көчөсүндөгү эт сатуучу жайга карата мыйзам бузуу фактылары катталып, 3 протокол түзүлдү. Объект ээлерине административдик айып пулдар салынды.
