Ош шаарында жеке ишкерлер менен курулушчулар ортосунда нааразычылык жаралды
Ош шаарындагы Алишер Навои атындагы парк аймагында жайгашкан ишкерлер соода түйүндөрүнүн демонтаждалышына байланыштуу жаңы мэр Жанар Акаевге кайрылышып, шаар башчысы кырдаалды жеринен көрүү үчүн окуя болгон жерге барды.
Мэр тиешелүү кызматтардын жетекчилери менен бирге парктагы соода түйүндөрүнүн ээлери жана жаңы объекттерди куруп жаткан компаниялардын өкүлдөрү менен жолугушту.
Тараптар ортодо жаралган пикир келишпестиктердин себептерин айтып, даттанышып, түшүндүрмө беришти.
Жанар Акаев Ош шаарынын тургундары үчүн ыңгайлуу шарттарды түзүү, ишкерлердин укуктарын коргоо жана шаарда тартипти сактоо башкы милдет экенин белгилеп, маселени мыйзамдын алкагында адилеттүү жана ачык-айкын чечүү зарылдыгын айтты.
Мэрия эске салгандай, буга чейин паркта тартип орнотуу максатында эски соода күркөлөрү алынган, аймак тазаланып, жаңы бак-дарактар отургузулган. Бул иштер шаар тургундары үчүн коопсуз, таза жана заманбап эс алуу аймагын түзүүгө багытталган.
Соода түйүндөрүн демонтаждоо иштери ушул жылдын январь айында ошол кездеги шаар башчысы Женишбек Токторбаевдин тапшырмасы менен башталган.
