Былтыр "Борбордук лабораториянын" кирешеси 340 млн сомду түзгөн
Жаратылыш ресурстары, экология жана техникалык көзөмөл министрлигине караштуу Борбордук лаборатория мамлекеттик ишканасы 2025-жылдагы ишмердүүлүгүнүн жыйынтыгын чыгарып, каржылык жана өндүрүштүк көрсөткүчтөрдүн олуттуу өсүшүнө жетишти.
Финансылык көрсөткүчтөргө ылайык, ишкананын кирешеси 340,1 млн сомду түзүп, бекитилген план 173,7%га аткарылды. Чыгымдар 192,0 млн сомду түзүп, салык төлөөгө чейинки пайда 148,1 млн сом, ал эми таза пайда 133,3 млн сом болду. Натыйжада пландар 337%дан ашык деңгээлде аткарылды. Мамлекеттик бюджетке 67,9 млн сом салык жана 29,9 млн сом камсыздандыруу төгүмдөрү которулду.
Отчеттук мезгилде 33 730 үлгү кабыл алынып, алардын 31 706сы лабораториялык изилдөөлөрдөн өткөрүлүп, жалпы суммасы 339,9 млн сомду түздү. Ошондой эле ири көлөмдөгү концентраттардан жана технологиялык үлгүлөрдөн инспекциялык тандоо иштери жүргүзүлдү.
2025-жылы ишкана техникалык кайра жабдууга 57,5 млн сом өз каражатынан жумшап, заманбап аналитикалык жабдууларды, автотранспортту сатып алды. Минералогиялык-технологиялык изилдөөлөр кайра жандантылып, Бишкек шаарынын ЖЭБинин отун лабораториясы кабыл алынып, көмүрдү техникалык талдоо боюнча аккредитацияланган адистештирилген топ түзүлдү.
Мындан тышкары, Министрлер Кабинетинин тескемесине ылайык, көмүрдү техникалык талдоо участогунун жабдууларын жаңылоого жана өндүрүштүк жайларды оңдоого 100 млн сом бөлүндү.
"Борбордук лаборатория" мамлекеттик ишканасы өнүгүү, модернизация жана лабораториялык изилдөөлөрдүн сапатын жогорулатуу багытындагы ишин ырааттуу улантууда.
