Жарандарды чет өлкөгө жөнөтүүгө лицензия алган компаниялардын тизмеси
Эмгек, социалдык камсыздоо жана миграция министрлигинде ведомстволор аралык комиссиянын отуруму болуп, анда Кыргыз Республикасынын жарандарына чет өлкөдө иштөөгө уруксаттарды берүү, узартуу жана жокко чыгаруу маселелери талкууланды. Бул тууралуу ведомстводон билдиришти.
Комиссия Түркия, Германия, Болгария, Словакия жана Перс булуңунун өлкөлөрүндө иштөөгө уруксат берүү, узартуу жана жокко чыгаруу боюнча арыздарды карап, 28 компания боюнча чечим кабыл алды. Алардын көпчүлүгүнө бир жылдык мөөнөткө рынокко чыгууга уруксат берилди.
- Түркияга жумушчуларды жөнөтүүгө "Камелотт", "Флай Джоб" жана "Прайм Тревел" агенттиктерине уруксат берилди.
- Германияга жумушка жөнөтүү иштерин "Скилл Вэй Консалтинг" жана "Аслан Жобагентур 1" компаниялары жүргүзөт.
- "Медиа Центр" жана "ИЛЦ" агенттиктери кошумча шарттар менен лицензия алып, аны аткарууга милдеттүү болушту.
- Словакияга жарандарды жөнөтүүчү "Азия КейДжи Консалт" жана "Консалтинговая компания Евразия" компанияларынын уруксаттары узартылды.
- "Ворк Тайм Консалтинг" компаниясынын Бириккен Араб Эмираттарына, Катарга жана Кувейтке жөнөтүү боюнча уруксаты да узартылды.
- Ал эми "Тугезе Рекрутмент" компаниясынын Хорватияга жумушка жөнөтүү өтүнүчү четке кагылды.
Комиссия белгилегендей, кабыл алынган чечимдер кыргызстандыктарды чет өлкөлөрдө ишке орноштуруу процессинин ачыктыгын камсыз кылуу жана уруксат берүүдө мыйзамдарды так сактоо максатында кабыл алынууда.
