Ысык-Көл райондук прокуратурасынын жаңы имараты ачылды
Ысык-Көл районунда прокуратуранын жаңы административдик имаратынын ачылыш аземи болуп өттү. Иш-чарага Башкы прокурору М.Асаналиев катышты. Бул тууралуу Башкы прокуратурадан билдиришти.
Ачылыш аземинде Башкы прокурор өз сөзүндө прокуратура органдарынын ишмердүүлүгүн институционалдык жактан бекемдөө мамлекет тарабынан туруктуу колдоого алынып жатканын белгиледи. Анын айтымында, жаңы имарат мыйзамдуулукту камсыз кылуу, укук тартибин чыңдоо жана жарандардын мыйзамдуу кызыкчылыктарын коргоо багытындагы иштердин сапатына оң таасирин тийгизет.
Ошондой эле ал прокуратура кызматкерлерин кызматтык милдеттерин ак ниет жана жоопкерчиликтүү аткарууга чакырды.
Жаңы административдик имарат заманбап талаптарга ылайык курулуп, керектүү техникалык жабдуулар менен камсыздалган. Бул өз кезегинде кызматкерлердин ишин натыйжалуу уюштурууга жана жарандарга сапаттуу кызмат көрсөтүүгө шарт түзөт.
Белгилей кетсек, өлкө аймагында прокуратура органдарынын имараттарын куруу жана капиталдык оңдоп-түзөөдөн өткөрүү иштери этап-этабы менен улантылууда. Бул багытта кызматкерлердин эмгек шарттарын жакшыртууга жана прокуратура органдарынын ишинин ачыктыгын жогорулатууга өзгөчө көңүл бурулуп келет.
