Ак-Бата конушунда 650 орундуу жаңы мектептин курулушу башталды
Бүгүн Курулуш, архитектура жана турак жай-коммуналдык чарба министри Нурдан ОрунтаевБишкек шаарынын Свердлов районуна караштуу Ак-Бата конушунда 650 орундуу жаңы мектептин курулушуна мезгил кутусун салды. Бул тууралуу ведомстводон билдиришти.
Иш-чарага Бишкек шаарынын мэри Айбек Джунушалиев, Жогорку Кеңештин депутаттары, жергиликтүү бийлик өкүлдөрү жана конуштун тургундары катышты.
Министр өз сөзүндө билим берүү инфраструктурасын өнүктүрүү мамлекеттин артыкчылыктуу багыттарынын бири экенин белгилеп, жаңы мектептин курулушу Ак-Бата конушундагы окуучулар үчүн сапаттуу жана ыңгайлуу шарттарды түзөрүн айтты. Ал ошондой эле мектептердин жетишсиздигин жоюу боюнча иштер мындан ары да улантыларын кошумчалады.
Долбоор боюнча мектептин жалпы аянты 5300,33 чарчы метрди, ал эми жер тилкесинин аянты 1,08 гектардытүзөт. Билим берүү мекемеси үч блоктон турган эки кабаттуу имарат болуп курулат.
Аймактын сейсмологиялык шартын эске алуу менен имарат 9 баллга чейинки жер титирөөгө туруктуу болуп салынат. Ошондой эле жер кыртышынын өзгөчөлүгүнө байланыштуу пайдубалын бекемдөө үчүн 8,8 метр тереңдикке чейин жер казуу иштери жүргүзүлөт.
Курулуш иштери Курулуш министрлиги тарабынан көзөмөлдөнүп, аны "ГрадСтройРесурс" ЖЧКсыжүргүзөт.
