Аламүдүндө мыйзамсыз курулуп жаткан бетон заводу аныкталды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Чүй регионалдык башкармалыгы Аламүдүн районундагы курулуш объектилеринде пландан тышкаркы текшерүү жүргүздү. Бул тууралуу ведомстводон билдиришти.
Текшерүүгө Байтик Баатыр айыл аймагынын №312, 314, 324 жана 326 контурларында бетон заводу курулуп жатканы тууралуу түшкөн маалымат негиз болгон.
Текшерүүнүн жүрүшүндө бетон түйүнүн курууга байланыштуу бекитилген долбоордук документация, курулушка уруксат берүүчү документтер жана ыйгарым укуктуу мамлекеттик органдар менен макулдашуулар жок экени аныкталды.
Мыйзам бузууларга байланыштуу курулуш иштерин жүргүзүп жаткан “Бишкек Инвестмент Групп” ЖЧКсына карата административдик чара көрүлүп, 200 миң сом өлчөмүндө айып пул салынды.
Ошондой эле мыйзам бузуулар толук жоюлуп, бардык тиешелүү уруксат берүүчү документтер мыйзамда белгиленген тартипте алынганга чейин бетон түйүнүн эксплуатациялоо иши токтотулду.
