Алдоо жолу аркылуу акча өндүрүү менен шугулданган 26 жаштагы кыз кармалды
2026-жылдын 2-мартында Бишкек шаарынын Октябрь РИИБна Г.Н. аттуу жаран арыз менен кайрылып, «Нурайым» аттуу жаранга карата чара көрүүнү суранган. Арыз ээсинин айтымында, 2026-жылдын февраль айынан 1-мартына чейинки мезгилде ал аял ишенимине кирип, «Telegram» мессенджери аркылуу акча каражаттарын көбөйтүү шылтоосу менен аны «трейдинг» деп аталган топко кошкон. Бишкек шаарынын ИИББнын Кылмыш иликтөө башкармалыгынын кызматкерлери бул алдамчылыкка шектүүнү кармашты.
Шаардык ИИББнын басма сөз кызматынан билдиргендей, көрсөтүлгөн нускамаларды аткарып, арыз ээси өз атына «МБанк», «О!Деньги» жана «Оптима Банк» төлөм уюмдарында банктык эсептерди жана электрондук капчыктарды ачкан. Андан соң белгисиз адамдар анын 40 000 сом өлчөмүндөгү акча каражатын алдап алып, байланышууга чыкпай коюшкан.
Аталган факт КРнын Кылмыш-жаза кодексинин 209-беренесине (Алдамчылык) ылайык кылмыш иши козголгон.
Тергөө-ыкчам иш-чараларынын жүрүшүндө Бишкек шаарынын ИИББнын КИБдин кызматкерлери тарабынан 2000-жылы туулган Н.И. аттуу жаран кармалып, шектүү катары аныкталды. Ал КРнын Кылмыш-жаза процессуалдык кодексинин 96-беренесине ылайык Бишкек шаарынын ИИББнын убактылуу камоочу жайына киргизилди. Учурда милиция кызматкерлери тарабынан анын ушул сыяктуу 10дон ашык алдамчылык фактыларына тиешеси бар экени аныкталды. Тергөө иш-чаралары улантылууда.
