Португалия Борбор Азияга, анын ичинде Кыргызстанга экспорттун кескин өсүшүн текшерип жатат
Португалиянын Финансы министрлиги жана көзөмөлдөөчү органдар Борбор Азия өлкөлөрүнө экспорттун өсүшүн текшерип жатышканын Público гезити жазды.
Макалада айтылгандай, Португалиянын экспорту Украинадагы согуш башталгандан кийин Россияга жакын жайгашкан өлкөлөргө олуттуу көбөйгөн. Европа биримдиги Москвага каршы санкцияларды киргизгенден кийин Португалиядан Россияга 2021-жылдагы 26 млн евролук экспорттон кыйла төмөн түшүп кеткен.
Португалиянын улуттук статистика институту жарыялаган жана Público басылмасы келтирген эл аралык соода боюнча маалыматтарга ылайык, португалиялык экспорт төмөнкү өлкөлөргө өскөн:
- Кыргызстан
- Казакстан
- Азербайжан
- Түркия
- Бириккен Араб эмираттары.
Португалиядан Кыргызстанга жөнөтүлгөн товарлардын көлөмү 2021-жылы болжол менен 200 миң евродон 2025-жылы дээрлик 6 млн еврого чейин өскөн. Басылма бул багыт улуттук экспорттун эң тез өсүп жаткан багыты экенин белгилейт.
Ошондой эле эң көп импорт көбөйгөн бул беш өлкө Россияга географиялык жактан жакын экени жана саясий байланыштары бириктирери айтылат.
Экспорттолгон негизги товарлардын бири — шарап заводдору үчүн тыгындар (пробкалар). Аларды өндүрүүдө Португалия дүйнөдө лидер болуп эсептелет. Público басылмасы белгилегендей, согушка чейин бул тыгындар Россияга экспорттолчу. Бирок кийин алар аскердик максатта колдонулушу мүмкүн деген себеп менен экспортко тыюу салынган.
Ошол эле учурда 2022-жылдын ортосунан тартып бул товарды жеткирүү төмөнкү өлкөлөргө көбөйгөн:
- Түркия
- Бириккене Араб эмираттары
- Кыргызстан
- Казакстан.
Басылма белгилегендей, иш жүзүндө португалиялык компаниялар, ошондой эле Европа биримдигинин өлкөлөрүнүн башка компаниялары товарларды үчүнчү өлкөлөргө экспорттоп, андан кийин Россияга кайра жөнөтүлүшү мүмкүн.
