Кыргызстанда чийки сүттүн базалык баасын аныктоо маселеси талкууланды
Кечээ Экономика жана коммерция министрлигине караштуу Монополияга каршы жөнгө салуу кызматында Суу ресурстары, айыл чарба жана кайра иштетүү өнөр жайы министрлигинин өкүлү менен жумушчу жолугушуу өткөрүлдү. Бул тууралуу Монополияга каршы жөнгө салуу кызматынан билдиришти.
Жолугушуу Министрлер Кабинетинин 2024-жылдын 4-декабрындагы №724 “Чийки сүткө базалык бааларды белгилөө жөнүндө” токтому менен бекитилген чийки сүттүн базалык баасын аныктоо тартибин ишке ашыруунун алкагында уюштурулду.
Жыйындын жүрүшүндө Кыргызстандын аймактары боюнча чийки сүттүн базалык бааларын аныктоо маселелери каралды.
Жолугушуунун жыйынтыгында фермерлерди колдоо жана өлкөнүн аймактарында сүт тармагын өнүктүрүүнү илгерилетүү максатында чийки сүттүн базалык бааларын аныктоодо айкын жана тең салмактуу мамилени камсыздоонун маанилүүлүгү белгиленди.
Министрлик тарабынан ведомстволор аралык жумушчу топтор менен иш алып баруу улантылат. Тартипке ылайык, чийки сүттүн базалык баалары ар бир сүттү кайра иштетүүчү завод үчүн бардык кызыкдар тараптардын пикирлерин эске алуу менен аныкталат.
Аталган баалар кышкы мезгил үчүн 15-сентябрга чейин, ал эми жайкы мезгил үчүн 15-мартка чейин белгиленип, кайра иштетүүчү ишканалардын чийки затка болгон керектөөсү жана баага таасир этүүчү башка факторлор эске алынат.
