Кара-Суудагы мектеп 37 жылдан кийин капиталдык оңдоодон өттү
Ош облусунун Кара-Суу районундагы №100 Санабар Бахапова атындагы мектеп 37 жылдан кийин толук капиталдык оңдоодон өткөрүлдү. Учурда билим берүү мекемесинде 856 окуучу билим алууда. Бул тууралуу Курулуш министрлигинен билдиришти.
Курулуш министрлигинин маалыматына ылайык, 2025-жылдын октябрь айында мамлекеттик бюджеттен 63 млн сом бөлүнүп, мектепте капиталдык оңдоо иштери башталган. Учурда бардык иштер толук аяктап, окуучулар жаңыланган мектепте билим алып жатышат.
Капиталдык оңдоонун алкагында жылытуу жана жарыктандыруу системалары алмаштырылып, имараттын чатыры толук жаңыланды. Ошондой эле мектептин ички бөлмөлөрү заманбап талаптарга ылайык жасалып, окуучулар үчүн ыңгайлуу шарттар түзүлдү.
Белгилей кетсек, аталган мектеп 1988-жылдан бери иштеп келет.
