Лариса Долина батири боюнча 176 млн рубль өндүрүп берүү талабын коюп сотко кайрылды
Ал мүлктүк чыгымды өндүрүп алуу боюнча доо арызын Москванын Балашиха шаардык сотуна жолдогонун соттун басма сөз кызматы билдирген.
Доо арызда жоопкер катары А. Н. Цырульникова, Д. М. Леонтьева, А. И. Каменецкий жана А. Д. Основа көрсөтүлгөн. Буга чейин сот аларды өзгөчө ири өлчөмдөгү алдамчылык боюнча күнөөлүү деп таап, төрт жылдан жети жылга чейин эркинен ажыратуу жазасын берген.
Эске салсак, 2024-жылы Лариса Долина алдамчылардын кысымы астында батирин сатып жиберген. Батирди 34 жаштагы Полина Лурье сатып алган жана ал алдамчылык тууралуу билген эмес. Ырчы сотко кайрылып, алгачкы чечим менен батир кайра Долинага кайтарылган. Ошол эле учурда сот ырчы сатып алуучуга акчаны кайтарып бербеши керек деген чечим чыгарган. Натыйжада Полина Лурье батирсиз да, акчасыз да калган.
Бул окуя социалдык тармактарда чоң талкуу жараткан. Колдонуучулар Лариса Долинаны катуу сынга алып, батирди мыйзамдуу сатып алуучуга кайтарып берүүнү талап кылышкан. Андан кийин гана алдамчылар менен соттошуу керектиги айтылган. Интернетте "Долинанын эффектиси" же "чоң эненин схемасы" деген түшүнүк да пайда болгон. Анын маңызы — батир сатылгандан кийин сатуучу өзүн алдамчылыктын курмандыгы катары көрсөтүп, келишимди жокко чыгарууга аракет кылат.
2025-жылдын декабрында Россиянын Жогорку соту батирге менчик укугун Полина Лурьеге таандык деп чечим чыгарган. Ошондой эле Долинаны батирден мажбурлап чыгаруу боюнча иш кайрадан апелляциялык инстанцияда каралууга жөнөтүлгөн. Ырчы 2026-жылдын январь айынын башында батирден чыгып кеткен.
