1-апрелден тартып медицина кызматкерлеринин эмгек маяналары 100% көтөрүлөт
Президент Садыр Жапаров буга чейин мамлекет дарыгерлерге колдоо болоорун, алардын эмгек маяналары көтөрүлөрүн айтып келген. Ушуга байланыштуу азыр, ооруканалардагы медицина кызматкерлеринин тартыштыгын чечүү, медициналык мекемелерге жүктү азайтуу боюнча иштер жүрүп жатат.
Президенттин басма сөз катчысы Аскат Алагөзов бул тууралуу өзүнүн баракчасында билдирди. Анын айтымында, мамлекет башчы дарыгерлердин социалдык абалын жакшыртуу максатында, Мамлекеттик ипотекалык компания аркылуу жеңилдетилген шарт менен ипотекага батирлерди берүүдө медицина кызматкерлерине артыкчылык берүү боюнча тийиштүү тапшырмаларды берди.
“Медициналык окуу жайды бүтүрүп, ишке жаңы келген жаш дарыгерлер бүгүнкү күндө 13 581 сом алса, апрель айынан баштап колуна 35 248 сом алышат. Албетте, эмгек тажрыйбасы мол дарыгерлердин апрелден кийинки эмгек маянасы ошого жараша көп болот. Башкача айтканда, “стаж үчүн” деген сыяктуу кошумча төлөмдөр жоюлбайт. Алыскы тоолуу райондорго иштөөгө даяр дарыгерлердин айлыгы кошумча орточо эсеп менен дагы 30%га көбөйөт” - деп билдирди Алакөзов.
Ошондой эле “Дарыгердин депозити” программасы боюнча мамлекет дарыгерлерге кварталына 66 000 сомдон төлөп берет. Мындан сырткары өлкөдөгү 28 миң медайымдын айлык акысы 8541 сомдон 29053 сомго чейин, же үч эсеге көтөрүлө тургандыгы президенттин басма сөз катчысы кабарлады.
