Таласка келген дарыгерлердин акысыз кароосу, узун кезек жана убараланган элдин үнү

Бүгүн, 22-мартта Талас областтык ооруканасында “Алтын Альянс” ишканасынын финансылык колдоосунун негизинде Бишкек шаарынан белгилүү хирург, лор, уролог, гинеколог, маммолог жана кардиолог дарыгерлери келишип, акысыз кабыл алышы пландалган. Ага ылайык УЗИ, ЭХО, ЭКГ жана башка дартты аныктоо жолдору жергиликтүү калк үчүн акысыз жүргүзүлмөкчү.

“Ишкер медианын” катталуучуларынын билдирүүсүнө караганда, кесипкөй дарыгерлер 1 күнгө жана 6-7 саат убакытка гана бейтаптарды текшерүүгө убакыт бөлүшкөн. Ушундан улам, дарыгердин кабыл алуусуна жетпей калган жергиликтүү элдин нааразылыгы жаралууда. Анткени, акысыз каралууну каалаган элдин кезегинин узундугу, убакыттын чектелүүсү көпчүлүктү убаракерчиликке салган. Айрыкча алыскы райондон келген бейтаптар, мындай акысыз акцияны жок дегенде 2-3 күнгө кылса болмоктугун билдиришип, өз ойлорун комментарийге калтырышкан.  

Белгилей кетсек, 2022-жылдагы маалымат боюнча Талас облусунун калкынын саны болжол менен 274 029 адамды түзөт. Облус 4 райондон, 36 айылдык округдан жана 90 айылдан турат.