Шамалды-Сайда 330 орундуу бала бакча жаңыланып, пайдаланууга берилди
Ноокен районунун Шамалды-Сай шаарында 330 орундуу бала бакча капиталдык оңдоп-түзөөдөн кийин пайдаланууга берилди. Бул тууралуу президенттин Жалал-Абад облусундагы өкүлчүлүгүнөн билдиришти.
Маалыматка ылайык, оңдоо иштери республикалык бюджеттин эсебинен жүргүзүлүп, 36,9 млн сомдон ашуун каражат жумшалды. Натыйжада имарат толугу менен жаңыланып, заманбап шарттар түзүлдү.
Ачылыш аземине катышкан облус башчысы Тилек Текебаев бала бакчалар балдардын интеллектуалдык жана руханий өнүгүүсүндө маанилүү роль ойной турганын белгиледи. Ал ошондой эле социалдык объекттерди куруу жана жаңылоо мамлекеттик саясаттын артыкчылыктуу багыттарынын бири экенин айтты.
Мындан тышкары, акыркы жылдары Ноокен районунда, айрыкча билим берүү тармагында аткарылып жаткан иштер тууралуу маалымат берилди.
