Чүйдө балык чарбалары өнүгүүдө: экспортту кеңейтүү маселеси көтөрүлдү
Суу ресурстары, айыл чарба жана кайра иштетүү өнөр жайы министри Эрлист Акунбеков Чүй районундагы "Премиум" жана "Пура" балык чарбаларына барып, тармактын абалы менен таанышты. Бул тууралуу Айыл чарба министрлигинен билдиришти.
Иш сапардын максаты — атамекендик балык тоютунун сапатын жана анын балыктын өсүшүнө тийгизген таасирин баалоо болду. "Тянь-Шань форель" компаниясы өндүргөн тоют жергиликтүү чийки заттан даярдалып, синтетикалык кошулмалар кошулбаганы белгиленди. Айрым көрсөткүчтөр боюнча жогорку натыйжа көрсөтүп жатканы айтылды.
Министр ишкерлер менен жолугушуп, кыргыз форелин брендге айлантуу, экспортту кеңейтүү жана тармакты өнүктүрүү боюнча тапшырмаларды берди. Ошондой эле бааларды туруктуу кармоо, импортко көз карандылыкты азайтуу жана өндүрүштү локалдаштыруу зарылдыгын белгиледи.
Жолугушууда ишкерлер жер салыгын жеңилдетүү, экспорттогу тоскоолдуктарды жоюу жана лабораториялык базаны өнүктүрүү маселелерин көтөрүштү. Министр тиешелүү органдарга сунуштарды карап чыгуу тапшырмасын берди.
Иш-чара ачык диалог форматында өттү.
