Парламент 16 жашка чейинки балдардын паспорт алуусун жөнөкөйлөтүүнү колдоду
Жогорку Кеңеште эл аралык иштер, коргоо, коопсуздук жана миграция боюнча комитет 16 жашка чейинки балдар үчүн паспорт алуу тартибин жөнөкөйлөтүүгө багытталган мыйзам долбоорун колдоду.
Жыйында депутаттар "Тышкы миграция жөнүндө" мыйзамга өзгөртүү киргизүү тууралуу демилгени карашты. Ал жашы жете элек жарандар үчүн чет өлкөгө чыгуучу паспортторду алуу жол-жобосун жеңилдетүүнү көздөйт.
Өзгөчө көңүл 16 жашка чейинки балдарга бурулуп, документ тапшыруу тартибин оптималдаштыруу жана ата-энелер менен мыйзамдуу өкүлдөр үчүн бюрократиялык тоскоолдуктарды азайтуу сунушталды.
Талкуунун жыйынтыгында комитет мыйзам долбоорун колдоп, аны экинчи окууда жактырды.
Демилгечилердин айтымында, сунушталган өзгөртүүлөр мамлекеттик кызмат көрсөтүүлөрдүн жеткиликтүүлүгүн жогорулатууга, документтерди тезирээк тариздөөгө жана балдардын чет өлкөгө чыгуудагы укуктарын натыйжалуу коргоого жардам берет.
