"Манас" социалдык айылында өз алдынча иштеп, үй-бүлө кургандар бар
Акыйкатчынын орун басары Айчүрөк Назаралиева Чүйдүн Мураке айылындагы майыптыгы бар жарандар үчүн адистештирилген “Манас” социалдык айылынын ишмердүүлүгү менен таанышты.
2004-жылы негизделген бул коомдук бирикме майыптыгы бар адамдарды обочолонтпой, аларды эмгекке жана чыгармачылыкка аралаштырууну көздөйт. Учурда мында 17ден 40 жашка чейинки 24 тургун жашайт. Алардын көбү мурда мамлекеттик стационардык мекемелерде тарбиялангандар.
Айыл тургундары атайын цехтерде кесиптик билим алып, андан соң төмөнкү багыттарда иштешет:
- Жыгач устачылык жана сувенир жасоо;
- Тигүүчүлүк жана экологиялык кагаз баштыктарды өндүрүү;
- Фермердик чарба (тоок багуу, наабайкана жана сүттү кайра иштетүү).
Өндүрүлгөн продукциялар Бишкек шаарындагы Турусбеков көчөсү, 52 дарегинде жайгашкан социалдык дүкөн аркылуу сатылып, түшкөн каражат айыл тургундарынын муктаждыктарына жумшалат.
Бул борбордун ийгилигинин башкы мисалы — ушул жерден баш кошуп, наристелүү болгон түгөйлөр. Учурда алар үчүн өзүнчө үй курулуп жатат, ал эми социалдык кызматкерлер наристени каралашууга көмөк көрсөтүшөт.
