Айыл чарба тармагына 63 даана жаңы техника тапшырылды
2026-жылдын 8-апрелинде КРнын Министрлер Кабинетинин Төрагасы Адылбек Касымалиев Суу ресурстары, айыл чарба жана кайра иштетүү өнөр жай министрлигине 63 даана атайын техниканын ачкычтарын расмий түрдө тапшырды.
Маалыматка ылайык, жаңы техникалардын 40 даанасы мамлекеттик бюджеттин эсебинен сатылып алынып, ага 128 млн сом жумшалган. Калган 23 техника эл аралык институттардын колдоосу менен алынган. Бул техникалар министрликтин райондук суу чарба башкармалыктарына бөлүштүрүлөт.
Иш-чаранын жүрүшүндө Министрлер Кабинетинин Төрагасы тармакты техникалык жактан чыңдоо мамлекет үчүн артыкчылыктуу багыт экенин белгиледи.
Анын айтымында, 2021–2025-жылдар аралыгында суу ресурстары тармагына республикалык бюджеттен 21,4 млрд сом бөлүнгөн. Бул каражаттар ирригациялык системаларды оңдоо, каналдарды реконструкциялоо жана сууну натыйжалуу пайдалануу иштерине багытталган. Бул тармакка акыркы беш жыл ичинде 270 жаңы техника алынган. Өкмөт ирригация тармагын мындан ары да өнүктүрүп, материалдык-техникалык базасын чыңдоону улантарын Адылбек Касымалиев билдирди.
Белгилей кетсек, жакынкы аралыкта Баткен облусунда 4200 гектар жерди сугат суу менен камсыз кылуучу «Алга Кадам» ирригациялык долбоорунун негизги иштерин аяктоо пландалууда. Долбоор 2027-жылы толук пайдаланууга берилет.
Ошондой эле, 2026-жылга 5 270 гектар жерге тамчылатып жана жамгырлатып сугаруу системаларды орнотуу пландар коюлган. Президенттин тапшырмасына ылайык Министрлер Кабинетине 2030-жылга чейин 2 жүз миң гектарга тамчылатып сугаруу системасын орнотуу милдети коюлган.
