Азия чемпионаты: Кыргызстан грек-рим күрөшүндө 3 алтын медаль утуп алды
7-апрелде Бишкек шаарында өткөн спорттук күрөш боюнча Азия чемпионатында грек-рим күрөшү боюнча финалдык беттештер жыйынтыкталып, кыргызстандык балбандар үч алтын медаль багындырышты.
63 кг салмак категориясында Афтандил Таалайбек уулу финалда ирандык Эрфан Жарканини 7:2 эсебинде жеңип, Кыргызстанга алгачкы алтын медалды алып келди.
77 кг салмакта Акжол Махмудов чечүүчү кармашта ирандык Али Оскоону 3:3 эсебинде сапат көрсөткүчү менен утуп, экинчи алтынды камсыз кылды.
Ал эми 87 кг салмак категориясында Асан Жанышов ирандык Холамреза Фарохисенджани үстүнөн 11:4 эсебинде ишенимдүү жеңишке жетип, үчүнчү алтын медалды жеңип алды.
Муну менен Кыргызстан Азия чемпионатында грек-рим күрөшү боюнча ийгиликтүү жыйынтык көрсөтүп, медалдык эсепти олуттуу толуктады.