Өлкөгө миллиондогон инвестиция тартып, SoftBank, Google жана Y Combinator'ду багындырган кыргызстандыктар
Глобалдык жана регионалдык деңгээлде азыркы мезгил стартаптарды түзүү жана венчурдук инвестицияларды өнүктүрүү үчүн эң ыңгайлуу учурлардын бири болуп саналарын ЦАРЭС технологиялык форумунда Кыргызстандагы стартап-акселератордун башкы директору Даниэль Абдылдаев билдирди.
Ал фаундерлерди үч топко бөлдү: борбордук азиялыктар, гибриддер жана юникорндар. Кыргызстандык Эркин Адылов дүйнөдөгү эң ири венчурдук фонддордун бири SoftBank Vision Fund 2 фондунан 100 млн доллар инвестиция тарткан. Анын компаниясы ири каржы институттарында, анын ичинде инвестициялык банктарда, хедж-фонддордо жана түз инвестиция фонддорунда комплаенс-тобокелдиктерди талдоо үчүн жасалма интеллектти колдонот.
Айзада Марат кызы негиздеген Alma компаниясы Кремний өрөөнүндө жайгашып, иммиграция тармагында жасалма интеллектти колдонууда.
Silitech компаниясы кымбат инфраструктурасыз эле айыл аймактарына вакциналарды жеткирүүгө мүмкүндүк берген технологияны иштеп чыккан жана Улуу Британияда жайгашкан.
Экинчи топ — "гибрид тарыхы" бар стартапчылар. Бул категорияга Google компаниясында иштеген биринчи кыргыз Тилек Мамутов сыяктуу ишкерлер кирет. Ал ошондой эле Кремний өрөөнүндө жайгашкан эң мыкты акселераторлордун бири болгон Y Combinator программасынан өткөн. Анын компаниясы өнүгүп келе жаткан өлкөлөрдүн жаш IT адистерине Apple, Netflix, Amazon жана Google сыяктуу компанияларда ишке орношууга жардам берет.
Компаниянын баасы учурда 60 млн долларга бааланууда. Ошол эле учурда ал кеңсесин Кремний өрөөнүнөн Бишкекке көчүрүп, жергиликтүү фаундерлер менен тажрыйба жана байланыштарын бөлүшүп келет.
Кыргызстандан чыккан MIT бүтүрүүчүсү Кайрат Ашимов да өз стартабын өлкөдөн башкарып келет. Анын долбоору АКШдагы улгайган адамдарга кам көрүү процесстерин автоматташтыруу үчүн жасалма интеллектти колдонот.
Юникорндар — бул баасы 1 млрд доллардан ашкан компаниялар. Азыр мындай компаниялар мурда негизги борбор болуп келген Кремний өрөөнүндө гана эмес, башка аймактарда да пайда болууда.
Казакстандык Higgsfield AI компаниясы жасалма интеллект аркылуу видео генерациялоо тармагында иштеп, OpenAI жана Google сыяктуу технологиялык гиганттар менен атаандашууда. Эки жылга жетпеген убакытта компаниянын баасы 5 млн доллардан 100 млн долларга чейин өстү.
Абдылдаевдин айтымында, азыр "тектоникалык өзгөрүү" болуп жаткан өткөөл мезгил. Мурдагы чоң өзгөрүү катары ал интернеттин пайда болушун атады.
Анын сөзүнө караганда, жасалма интеллекттин өнүгүшү биздин аймактагы фаундерлер үчүн да, инвесторлор үчүн да чоң мүмкүнчүлүктөрдү түзүүдө.
"Биз дүйнөлүк венчурдук келишимдердин көлөмүндө абдан кичинекей үлүштү ээлейбиз. Эгер дүйнө жүзүндө венчурдук капитал болжол менен 500 млрд долларды түзсө, биздин аймак өткөн жылы жалпысынан 100 млн долларды, ал эми быйыл 300 млн доллардан ашык көрсөткүчтү түздү", — деди ал.
Абдылдаев кошумчалагандай, Борбор Азия өлкөлөрү жасалма интеллект революциясына кошулууга аракет кылып жатат. Бул болсо фаундерлер жана инвесторлор үчүн жаңы мүмкүнчүлүктөрдү ачат.
"Биз 140 миллиондон ашуун калкы бар жана жүздөгөн миилиард долларлык ИДПсы бар рынокту түзөбүз (ЦАРЭС). Биригүү аркылуу гана биз дүйнөлүк технологиялык чөйрөгө интеграция боло алабыз", — деп жыйынтыктады ал.
