“Манас Ордо” реконструкциядан кийин күнүнө 10 миңге чейин конок кабыл алат
Талас облусундагы “Манас Ордо” улуттук комплексинде реконструкция жана курулуш иштери активдүү уланууда. Бул тууралуу өкүлчүлүктөн билдиришти.
Маалыматка ылайык, облус башчысы Эрмат Жумаев курулуш иштеринин жүрүшүнө көзөмөл жүргүзүп, сапатка өзгөчө көңүл буруу жана иштерди ыкчамдатуу зарылдыгын белгиледи.
Учурда “Манас Ордо” комплексинин жалпы аянты 225 гектарды түзөт. Жаңы долбоорго ылайык, музейдин аянты 450 чарчы метрден 1500 чарчы метрге чейин кеңейтилет. Комплекс улуттук өзгөчөлүктөрдү заманбап жана улуттук стилде айкалыштырган маданий борборго айланат.
Долбоор ишке ашкандан кийин комплекс күнүнө 10 миңге чейин конок кабыл ала алган Борбор Азиядагы уникалдуу маданий жайга айланары күтүлүүдө. Анда административдик борбор, 300 орундуу конгресс-холл, улуттук стилдеги коттедждер, жайкы жана кышкы ашканалар, ошондой эле салтанаттуу иш-чараларды өткөрүүчү жайлар курулат.
Мындан тышкары, 3500 орундуу маданий борбор, соода жана эс алуу галереясы да каралган.
Белгилей кетсек, аталган комплекс акыркы 30 жыл ичинде биринчи жолу ири реконструкциядан өтүүдө. Долбоор аяктагандан кийин 200дөн ашык жаңы жумуш орун түзүлүп, аймакта туризмди өнүктүрүүгө олуттуу салым кошот.
