Навигация жок, шарттар аз: Бишкектин алсыз жактарын мэрия моюнга алды
Мэр Айбек Джунушалиев "Биринчи радио" эфиринде шаар тургундарынын жеткиликтүү чөйрөнүн жоктугу, навигация маселелери жана жолдордун башаламан оңдолушу тууралуу даттанууларына комментарий берди.
Анын айтымында, жаңы объекттерди жана өтмөктөрдү курууда бийлик пандустарга жана мүмкүнчүлүгү чектелген адамдар үчүн ыңгайлуулукка көбүрөөк көңүл бура баштады. Шаарда буга чейин китепканалардын, филармониянын, театрлардын жана башка коомдук жайлардын жанында ондон ашык заманбап пандустар орнотулган.
Мэр бул маселелерге болгон мамиле өзгөрүп жатканын белгиледи, бирок кемчиликтер бар экенин да моюнга алды.
"Кемчиликтер бар, биз аларды танбайбыз. Бирок акырындык менен жоёбуз жана шаарды бардыгы үчүн жеткиликтүүрөөк кылабыз", — деди ал.
Өзүнчө ал көчө көрсөтмөлөрүнүн жоктугу маселесине токтолду. Анын айтымында, Бишкек кеңейгенден кийин көп көчөлөр кайталанган аталыштарды алып, бул тургундардын өздөрүнө да түшүнүксүздүк жаратат.
Бийлик даректөө жана навигация системасын иретке келтирип, жаңы табличкаларды орнотууну пландап жатат.
Ошондой эле тургундар жолдор оңдолуп жатканда жөө адамдар үчүн шарттар түзүлбөй жатканын айтып даттанышкан. Мэр бул көйгөйдү моюнга алып, көчөлөр жабылган учурда алдын ала альтернативалуу жолдорду ойлонуш керек экенин белгиледи.
