Кыргызстанга 90дон ашык турист поезд менен келди
Бүгүн, 17-апрелде Ысык-Көл облусунун Балыкчы шаарынан Бишкек шаарына Англиянын «GOLDEN EAGLE TRAINS» компаниясына таандык эл аралык туристтик поезд келди. Поезд менен Батыш Европадан, Түндүк Америкадан жана Чыгыш Азиядан туристтер келишти. Бул тууралуу “Кыргыз темир жолу” ишканасынан билдиришти.
Маалыматка таянсак, “Кыргыз Темир жолу” ишканасынын, Бишкек шаарынын мэриясынын маданият башкармалыгынын кызматкрлери туристтерди салтанаттуу тосуп алышты. Темир жол бекетинин аймагында элдик кол өнөрчүлүк көргөзмөсү уюштурулуп, анда туристтер шырдактарды, кийизден жасалган буюмдарды жана кыргыз элинин салттуу тиричилик буюмдарын көрө алышты.
Салтанаттуу тосуп алуудан кийин туристтер Бишкек шаары боюнча обзордук экскурсияга чыгышты. Программада шаардын тарыхы, архитектурасы жана бүгүнкү шаар турмушу менен таанышышат.
Туристтердин Кыргызстандагы сапары 16-апрелде башталган. Ысык-Көл облусунда алар үчүн өзүнчө программа уюштурулуп, көл жээгинде сейилдөө, жаратылыш жана кыргыз элинин маданий салттары менен таанышуу мүмкүнчүлүгү түзүлгөн.
Туристтик поезд 17 заманбап, ыңгайлуу вагондон турат. Жалпысынан өлкөгө 90дон ашуун турист келген.
