Ысык-Көлдө коменданттык саат киргизилет
21–23-апрелде Ысык-Көл облусунун Каракол шаарында, Жети-Өгүз жана Ак-Суу райондорунда, ошондой эле Ош облусунун Араван жана Өзгөн райондорунда «Коопсуздук-2026» биргелешкен командалык-штабдык жана мобилизациялык окуу-машыгуусу өткөрүлөт. Бул тууралуу коргоо министрлигинен билдиришти.
Маалыматка ылайык, окуу-машыгуунун жүрүшүндө аскердик абал киргизилген шартта кырдаалды турукташтыруу боюнча окуу-күжүрмөн тапшырмалар аткарылып, резервдик түзүлүштөр практикалык түрдө чакырылат.
Ошондой эле стратегиялык объектилерди кайтаруу жана коргоо, блок-постторду коюу иштери Ички иштер министрлигинин бөлүмдөрү жана резервдик түзүлүштөр тарабынан уюштурулат.
Куралдуу күчтөрүнүн аскер кызматчыларынын катышуусуна, аскердик техниканын кыймылына жана резервисттерди мобилизациялоо иш-чараларына байланыштуу убактылуу ыңгайсыздыктар жаралышы мүмкүн. Коргоо министрлиги жарандарды сабырдуулук сактоого жана өткөрүлүп жаткан иш-чараларга түшүнүү менен мамиле кылууга чакырат.
