Кара-Балтада заманбап технология менен таштанды полигонун куруу пландалууда
Чүй облусунун Кара-Балта шаарында жапондордун «Фукуока» технологиясын колдонуу менен заманбап таштанды полигонун куруу боюнча пилоттук долбоорду ишке ашыруу пландалууда. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка таянсак, долбоор экологиялык жүктөмдү кескин азайтууга жана таштандыларды башкаруунун заманбап стандарттарына өтүүгө багытталган.
Азия өнүктүрүү банкынын жана Жапон фондунун өкүлдөрү менен болгон жумушчу жолугушуунун алкагында долбоорду ишке ашыруу маселелери талкууланды. Анын ичинде «Фукуока» технологиясын киргизүү, гранттык каржылоону тартуу жана техникалык колдоо көрсөтүү каралды.
«Фукуока» технологиясы таштандылардын табигый ажыроо процессин тездетет, уулуу фильтраттардын пайда болушун азайтат жана курчап турган чөйрөгө зыяндуу заттардын бөлүнүп чыгышын алдын алат. Салттуу полигондордон айырмаланып, ал өзүнөн-өзү өрттөнүү коркунучун минималдаштырат жана жагымсыз жыттардын жайылышын кыйла азайтат.
Долбоорду ишке ашыруу төмөнкүлөргө мүмкүндүк берет:
Топурактын жана жер астындагы суулардын булганышын азайтууга;
Тургундар үчүн санитардык коопсуздукту жогорулатууга;
Өлкө боюнча ушундай чечимдерди киргизүү үчүн модель түзүүгө;
Заманбап экологиялык технологияларга өтүү жарандардын ден соолугун коргоо жана өлкөнүн туруктуу өнүгүүсү үчүн зарыл шарт болуп саналат.
