Орусиянын жаранынан 9 млн рубль алган милиция кызматкерлери кармалды
ИИМдин Баңгизаттарды мыйзамсыз жүгүртүүгө каршы күрөшүү кызматынын П.М. аттуу бөлүм башчысы жана А.А. аттуу ыкчам кызматкери кармалды. Бул тууралуу УКМКдан маалымдашты.
Маалымтка ылайык, кылмышка шектүүлөр Орусиянын жаранынан баңгизаттарды мыйзамсыз жүгүртүү боюнча иште жазаны жеңилдетүүгө көмөк көрсөтүү үчүн 9 млн рубль акча талап кылышкан.
Кармалгандар жашыруун аракеттенүү жана түз далилдерди болтурбоо максатында пара алуунун аралыктан ишке ашырылган схемасын иштеп чыгышкан.
Кармалган жарандын үй-бүлөсү мүлкүн сатып тапкан акча каражаттарын Орусиядан бөлүп-бөлүп, атайын коюлган адамдардын атына катталган жана БМЖКККнын кызматкерлери тарабынан берилген «Сбербанк» банктык карталарына которуп турушкан.
Андан кийин акча каражаттарын нак акчага айландыруу жана Кыргызстандын аймагында мыйзамдаштыруу үчүн үчүнчү жактар да тартылган.
Бул ыкма кызмат адамдарына каржылык операцияларга өздөрүнүн тиешеси бар экенин жашырууга мүмкүндүк берген. Кармалгандар УКМКнын убактылуу кармоочу жайына киргизилди.
Башка тиешеси бар адамдарды аныктоо боюнча мындан аркы тергөө-ыкчам иш-чаралары жүргүзүлүүдө.
