Саламаттыкты сактоо министрлиги маяна тууралуу түшүндүрмө берди
Социалдык тармактарда медицина кызматкерлеринин айлык маянасы боюнча дүмүрчөктүн сүрөтү тарап, кызуу талкууга алынган. Бул маалыматка карата Саламаттыкты сактоо министрлиги расмий билдирүү таратты.
Маалыматка ылайык, тарап жаткан дүмүчөктөгү эсептелген эмгек акы март айына тийиштүү. Президенттин жарлыгына ылайык, медицина кызматкерлеринин айлыгы 1-апрелден тарта көбөйтүлдү. Март айында эмгек акы мурдагы эсеп менен берилген, ал эми жогорулатылган эмгек акы апрель айынын жыйынтыгы менен, айдын аягында төлөнөт.
“Тараган дүмүрчөктө толук ставка эмес, 0,5 ставкада иштеген кызматкердин эмгек акысы көрсөтүлгөн. Мурда мындай ставка 8617 сомду түзсө, азыр болжол менен 13 миң 500 сомго чейин жогорулайт. Мындан тышкары, 7 500 сом өлчөмүндө президенттик компенсация кошулуп, жалпы эмгек акы 21 миң сомго чейин жетет”, - деп айтылат маалыматта.
Министрлик толук ставкадагы дарыгерлер үчүн мисал келтирди:
1 ставка (10 жылдык тажрыйба, II квалификациялык категория):
Базалык маяна: 27 104 сом
Иш стажы (10%): 2 710 сом
Квалификациялык категория үчүн кошумча: 2 миң сом
Жалпы эсептелген эмгек акы: 31 миң 814 сом
Ага кошумча президенттик компенсация: 15 миң сом
Жалпы эсептелген сумма: 46 миң 814 сом
Колуна: 39 миң 260 сомго чейин.
Буга байланыштуу министрлик медицина кызматкерлер жана ЖМК өкүлдөрүн расмий такталган маалымат толук жарыяланганга чейин такталбаган маалыматтарды таратуудан карманууну суранат.
