Кыргызстандык айдоочулар Европада экзаменге кирбестен Code 95 сертификатын ала алышат

Оор жүк ташуучу унаалардын айдоочулары үчүн эл аралык эмгек рыногунда ишке орношуу мүмкүнчүлүгүн кеңейтүүгө багытталган маанилүү жаңылык болуп, Кыргызстанда европалык кесиптик айдоочулук сертификаты - Code 95 алуу боюнча окуу программасы ишке киргизилгени кабарланды. Бул тууралуу президенттин иш башкармалыгынын башчысы Каныбек Туманбаев билдирди.

Каныбек Туманбаевдин айтымында, окутуу лицензияланган европалык компаниянын катышуусунда жүргүзүлөт. "Бул эң негизгиси биздин жарандарга Европа Биримдигинин өлкөлөрүнө барбастан эле, ортомчусуз, керектүү квалификацияны алууга мүмкүнчүлүк түзүп, убакытты жана чыгымдарды олуттуу кыскартат. Бизге жеткен маалыматка ылайык Европа Биримдигинин өлкөлөрүндө дагы Code 95 алууда да ортомчулар пайда болуп, чыгымдар 3000 еврого чейин чыгып жатыптыр", - дейт Туманбаев.

Бул сертификатка ээ болгон жарандар Европа Биримдигинин аймагында расмий түрдө иштей алышат жана окутуу эки форматта жүргүзүлөт:

— 1 жумалык курс — 2009-жылдын 10-сентябрына чейин CE категориясын алган айдоочулар үчүн.

Бул курс болжол менен 35 сааттык теориялык окутууну камтыйт. Мындан тышкары, ушуга жакын көлөмдө практикалык сабактар да болот.

— 3 жумалык курс — 2009-жылдын 10-сентябрынан кийин CE категориясын алган айдоочулар үчүн.

Кыргызстанда окуудан өткөндөн кийин, айдоочулар Европага барганда кошумча экзамендерсиз жана кошумча окутуусуз эле Code 95 сертификатын ала алышат. Code 95 сертификаты улуттук айдоочулук күбөлүк менен бирге көрсөтүлгөндө жарактуу болот.