Муздак суунун баасынын кымбатташынын себептери айтылды
Антимонополия кызматы менен макулдашылган жаңы тарифтерге ылайык Бишкек шаарында муздак суунун 1 кубометри - 15,73 сом (азыр 10,45 сом), ал эми канализация - 6,80 сом (азыр 3,45 сом) болушу күтүлөт. “Бишкек суу каналы” муниципалдык ишканасынын директорунун орун басары Канимет уулу Алибек Биринчи радиого берген маегинде тарифти жогорулатууга бир катар факторлор себеп болуп жаткандыгын билдирди.
Анын айтымында, башкы максат - инженердик инфраструктураны жаңылоо жана тармакты туруктуу каржылоо үчүн шарт түзүү. Адис белгилегендей, сууга болгон керектөөнүн көбөйүшү жалаң гана турмуштук муктаждыктар менен эмес, аны сарамжалсыз пайдалануу менен да байланыштуу. Мисалы шаарда сууну керектөө айрыкча жаз-жай мезгилинде кескин көбөйүп, аны керектөө кышкы мезгилге салыштырмалуу 25%га жогорулайт.
“Бүгүнкү күндө борбор калаа негизинен жер алдындагы эки ири суу бассейнинен камсыздалат. “Бишкек суу каналы” 332 миң абонент менен келишим түзгөн. Шаардын суткалык орточо керектөөсү 500 миң куб метрге жакын болсо, ысык маала бул көрсөткүч 600 миң куб метрден ашат” - дейт Канимет уулу Алибек.
Адистин билдирүүсүнө караганда, тарифтерди жогорулатууга электр энергиясынын кымбатташы да таасир этүүдө. Ошондой эле суу жана канализация тутүктөрү өткөн кылымдын 1950-1960-жылдары курулгандыктан, эскилиги жеткен.
